(This content contains details about a stabbing incident, which may be disturbing or triggering for some readers.)
Patay ang isa ka lalaki matapos nga ginbuno sang iya hilaw nga umagad sa Barangay Sto. Niño, San Miguel, Iloilo.
Natabo ang krimen sa sulod mismo sa balay sang biktima.
Ang biktima amo si alyas Albert, 47-anyos samtang ang suspek amo si alyas Ian, 34-anyos.
Stepdaughter sang biktima ang live-in partner sang suspek.
Sa interview sang Bombo Radyo kay Anabelle Agunda, live-in partner sang biktima, iya ginpahayag nga antes ang insidente, wala man ini sang naobserbahan nga may konplikto sa tunga sang iya partner kag sang suspek.
Apang, baliskad diri ang pahayag ni alyas Ann nga anak ni Agunda.
Suno kay Ann nga live- in partner sang suspek, nakasugid sa iya si Ian nga ginkastigo ini ni Albert kag ginatan-aw nga rason kun ngaa ginhimo sang suspek ang krimen.
Ginpahayag pa nga ginhulat sang suspek nga makatulog ang biktima antes ini gintadtad sang buno nga naglab-ot sa 21 ka beses.
Pagkatapos sang krimen, madasig nga nagpalagyo ang suspek dala ang iya mga gamit.
Tubtob subong, at-large pa ini kag wala na nakapakig-angot sa iya live-in partner nga si Alyas Ann.
