Mangatubang sang civil kag criminal complaints ang isa ka persona kag printing press sa syudad sang Iloilo bangud sa ginapahayag pag-imprinta sang propaganda posters nga nagasamad sa reputasyon ni Iloilo City Mayor Jerry Treñas.
Sa interview sang Bombo Radyo kay Treñas, iya ginpahayag nga certain Joe Mari Daban ang nagpa-print sang 500 ka posters sa Makinaugalingon Printing Press sa Molo, Iloilo City.
Ginpahayag sang alkalde nga indi sini kilala si Daban, kag indi man sini mahangpan kun ngaa tugutan sang printing press nga i-produce ang amo nga material apisar nga maathag ini nga pagsamad sa dignidad sang isa ka tawo.
Nagapati ang alkalde nga tuyo ipangtapik ang amo nga posters sa mga barangay sa syudad — butang nga iya ginlaragway nga ‘patalang kag pangguba.’
Pila sa isyu nga unod sang mga poster suno sa alkalde amo ang alegasyon nga may lain siya nga babayi, may bata nga si Andrew, may mansion sa Anilao, kag iban pa.
“Ginsiling nila nga may relasyon ako sa isa ka babayi. May bata kuno ako nga ngalan ya si Andrew. Kag may napulo kuno ako ka poultry nga mga balay. Tapos may balay kuno ako sa Anilao. May balay gid man ako sa Anilao pero gina-deny ko nga may karelasyon ako nga lain nga babayi, kag gina-deny ko man nga may bata ako nga si Andrew ang ngalan ya. Kag gina-deny ko man nga may 10 ako ka balay nga poultry kay tatlo lang to ka bilog,” suno sa alkalde.
Ginpadala na sang abogado ang sulat sa Makinaugalingon Printing Press.
Wala ginhingadlan sang alkalde kun sin-o ang iya nga ginapatihan nga yara sa likod sang iya ginpahayag ‘pagpang-guba’, apang suno sa iya, “amo na gid ini kanubo ang lebel sang pamulitika sa syudad? Daw wala man ini sang una? Subong daw kabastos na gid nga wala nagataha sa dignidad sang isa ka tawo.”
Gintawag sini nga ‘prinsipe kay reyna sang kadulom’ ang yara sa likod sang pagpa-imprinta sang mga posters. ##
