𝗜𝗟𝗢𝗜𝗟𝗢 𝗖𝗜𝗧𝗬 – Nagalaom si former Banat Party-list Representative Salvador ‘Buddy’ Britanico nga mahatagan na sang hustisya kag kasanagan ang pagpatay sa iya anak nga nabiktima sang extrajudicial killings sa idalom sang Duterte administration.
Ang biktima amo si Delfin Britanico, isa ka negosyante nga ginluthang-patay sa Iloilo River Boulevard sa Bgy. Nabitasan, La Paz, Iloilo City kag isa ka drug surrenderer.
Natabo ang pagpatay sa negosyante sang Enero 19, 2020.
Sa interview sang Bombo Radyo kay former Representative Britanico, iya ginpahayag nga pending sa gihapon sa Department of Justice (DOJ) ang kaso sa pagpatay sa iya anak.
Suno sa natungdan, bangud sa quad committee hearing sa Kamara, positibo ini nga madalagan na ang kaso indi lang sang iya anak kundi sa iban pa nga mga nabiktima sang war on drugs.
Magluwas diri, nagalaom man ini nga makapasar sang mga bag-o nga layi ang mga mamalidha santo sa mga natukiban sa hearing.
Matandaan nga naghalin si Delfin sa iya nga balay sa Prime Estate Subdivision bangud mapadulong ini kuntani sa iya condominium unit sa San Rafael, Mandurriao, Iloilo City sakay sa iya nga BMW nga motorsiklo.
Base sa ginpatigayon nga imbestigasyon sang National Bureau of Investigation (NBI), natukiban nga si Police Corporal Joseph Andrew Poneles Joven ang nagserbe driver sang Mitsubishi Adventure nga gingamit sa pagpatay kay Delfin.
Sa sworn statement ni Joven, kaupod ang iya application nga mangin state witness nga gin-file sa Office of the Prosecutor General sa Department of Justice sa Ermita, Manila, ang mga kaupod niya sa sulod sang salakyan amo sanday Police Staff Sergeant Ricardo Cabrera Morante kag Police Master Sergeant Vernie Lui Escorial, nga amo ang iya gintumod nga nagtiro patay kay Delfin.
Ang iban pa gid nila nga kaupod sa salakyan amo sanday Police Staff Sergeant Michael Demegillo de Felipe kag Police Staff Sergeant Freddie Hibalo Libo-on.
Suno kay Britanico, ginbuyagyag ni Joven sa iya statement nga ang mayor nga nagtiro sa iya nga bata amo si Morante kag ang nag-finishing naman amo si Escorial.
Gindala naman ni Britanico si former Iloilo City Police Office Director Col. Martin Defensor nga “Accessory to a Crime” bangud sa pagdepensa kag pag-apin sa iya mga tinawo.
Matandaan nga base sa imbestigasyon sang NBI, ang mga suspek amo man ang ginalantaw nga yara sa likod sang kamatayon ni Alain Muller Muller nga ginpatay man antes kay Delfin sa Barangay Cuartero, Jaro, Iloilo City sa ginbansagan twin shooting sang amo nga adlaw.
