𝗜𝗟𝗢𝗜𝗟𝗢 𝗖𝗜𝗧𝗬—Ginatinghuwaan sang Western Visayas Transport Cooperative (WVTC) nga iduso sa Land Transportation Franchising and Regulatory Board (LTFRB) ang cashless payment paagi sa tap card.
Sa interview sang Bombo Radyo kay Mr. Boyet Parcon, presidente sang Western Visayas Transport Cooperative, iya ginpahayag nga plano sang talatapan nga magpadulong sa mga eskwelahan agud nga i-eksplekar sa mga estudyante kag ginikanan ang importansya sang tap card.
Suno kay Parcon, paagi sa tap card, mahimo ini nga sudlan sang mga estudyante kag komyuters sang balor nga ila masarangan agud magamit kon magasakay sa modernized units.
Ginpahayag man sini nga iga-implementar man ang programa sa mga kondoktor agud nga ma-edukar kag direkta nga resibo na lang ang igahatag sa mga komyuters.
Nagalaum man ang natungdan nga kon ini ang matigayon nga maaprubahan sang LTFRB, magasugod na sila pamakal sang mga tap card agud nga mapanagtag sa mga terminals kag sa may tuyo nga mag-avail.
