ILOILO – Indi kaangay sa ginpatuman ni Mayor Jerry Treñas sa Iloilo City Hall, wala sang patigayunon nga COVID-19 mass testing sa Iloilo Provincial Capitol.
Sa interview sang Bombo Radyo kay Iloilo Governor Arthur Defensor Jr., iya ginpahayag nga ginasunod sang probinsya sang Iloilo ang symptoms-based testing; buot silingon, ang mga empleyado lang nga may sintomas ang ipaidalom sa swab test.
“Ginasunod naton ang symptoms-based [testing]. Indi nga i-test naton tanan. We don’t do that,” pahayag sang gobernador. Ang ginahimo pa gid suno kay Defensor amo ang 50% workforce sa kapitolyo.
Regular man nga ginapatigayon ang disinfection agud mapat-od nga hilway sa virus ang mga talatapan. “It’s safe for the people. It’s safe for the employees.”
Una naman nga ginpahayag sang gobernador nga wala siya sang plano nga pasakaon sa mas mataas nga quarantine classification ang Iloilo Province.
Suno kay Defensor, bisan naka-modified general community quarantine (MGCQ) ang probinsya sang Iloilo nga mas manubo sa quarantine status sang Iloilo City, daw kaangay man nga MECQ na gani ang status sang probinsya bangud sa pagpanghugot sa mga protocol.
Sa Iloilo Province, suspendido ang recreational establishments tubtob sa katapusan sang Mayo 2021, may liquor ban tubtob Mayo 31, may containment measures sa barangay level, kag may intensive contact tracing nga ginmandu sa local task forces.
‘MEANWHILE IN ILOILO CITY…’
Santo sa latest record sang Iloilo City Epidemiology and Surveillance Unit, nagdangat na sa 64 ka mga empleyado sang Iloilo City Hall ang positibo sa COVID-19.
Ini matapos ginpatigayon ang COVID-19 MASS TESTING halin sang Lunes, Mayo 24.
“All city hall employees; elective officials; workers, including job hires and those under contract of service are required to undergo RT-PCR (reverse transcription polymerase chain reaction) testing by batches, following the schedule set by the Iloilo City Health Office, which shall be relayed to the concerned department/office heads,” santo sa Executive Order No. 043 nga ginpirmahan sang alkalde.Tubtob bwas, Mayo 28, ang mass testing kag ginapanan-aw nga labi pa nga magasaka ang kaso sang amo nga balatian.
Gina-facility-quarantine ang mga nagpositibo nga pasyente.Bangud sang mass testing, ginpahayag ni Mayor Jerry Treñas nga overwhelmed na ang Uswag Molecular Laboratory kag nagpangayo na sang bulig sa Western Visayas Molecular Laboratory para sa pag-run sang mga specimen.
Sa iya mensahe subong nga gab-i, Mayo 27, nag-apelar man ang alkalde sa publiko nga magkooperar man subong nga naka-MECQ ang syudad.
Gutok na suno sa iya ang mga ospital bangud sa COVID-19 patients.
Sa Iloilo City, may ginpatuman nga border control umpisa Mayo 26 kag in-place ang liquor ban tubtob Mayo 31.
