Dakop sa drug buy bust operation ang isa ka babaye kag duha ka mga lalaki sa sulod mismo sang Pension House sa Ledesma St., Iloilo City Proper.
Ang mga arestado amo sanday Gherlie Ann Carlos, 26, sang Barangay Nagba, Tigbauan, Iloilo; Jose Kim Lustro, 26, sang Poblacion St., Barangay Delgado, Calinog, Iloilo kag John Michael Baluyot sang Arroyo St., Zone 1, Sta. Barbara, Iloilo.
Sa interview sang Bombo Radyo kay PLt. Colonel Rene Obregon, Chief sang City Drug Enforcement Unit, iya ginpahayag nga duha na ka bulan nila nga ginamonitor ang mga nagkaladakpan.
Si Baluyot ang naka-check in sa separado nga kwarto amo man sanday Carlos kag Lustro nga magkarelasyon.
Suno kay Obregon, nakuha sa kwarto ni Baluyot ang 10 ka sachet sang ginapatihan shabu kag P9,600 nga balor sang buybust item.
Sa kwarto naman sang magkarelasyon, nakuha ang 3 grams sang iligal nga droga sa diin ang kada 1 gram ang nagabalor sang P6,800.
