CULASI, ANTIQUE – Nagsungka sa Culasi PNP ang labing una nga preso sa Western Visayas nga nakabenepisyo sang Good Conduct Time Allowance.
Sa interview sang Bombo Radyo kay Police Captain Clark Philip Dinco, hepe sang Culasi Municipal Police Station, iya ginpahayag nga ang nagsungka nga preso amo si Pedro Salazar, 57, sang Brgy. Buhi, Culasi, Antique nga naulamid sadto sa kaso nga murder sang 1992 kag ginpreso sa New Bilibid Prison sa Muntinlupa City.
Suno kay Dinco, pagkatapos sang pagsungka ni Salazar, gilayon ini nga iturn-over sa Bureau of Corrections para sa registration.
Ginpahayag ni Dinco nga indi nila mahimo nga ibalik liwat sa presuhan ang mga preso nga nahatagan sang Good Conduct Time Allowance bangud nga wala man sila sang may nahimo nga sala.
Magluwas diri, ginpahayag man sang natungdan nga indi man nila mahimo nga dakpon ang mga preso nga nakabenepisyo sang Good Conduct Time Allowance bangud nga wala man sila sang warrant of arrest kag makabig nga valid sa gihapon ang release order.
Sa subong, ginpahayag sang hepe nga nagapakig-angot siya sa Police Regional Office 6 kag sa Bureau of Corrections Palawan tuhoy sa specific memorandum gikan kay Presidente Rodrigo Duterte.
Ang mga preso nga nagsungka suno kay Dinco ang ginapaidalom sa strict observation sang intelligence operative.
