Makabaton sang tag-P7,000 nga cash aid ang isa ka milyon nga mga mangunguma sa idalom sang ginaduso nga P6.7 trillion nga budget para sa 2026.
Gin-anunsyo ini ni House Speaker Faustino “Bojie” Dy III kadungan sang joint hearing sang House Committee on Agriculture and Food kag Committee on Ways and Means subong nga adlaw, Oktubre 6.
Pahayag sang Speaker, ihatag ang kuwarta bilang bulig bangud sa kapierdehan sang mga mangunguma dala sang manubo nga farmgate prices sang humay.
“Aid is ensured for our farmers. The P7,000 cash aid will be given to them to address their losses due to low farmgate prices of palay,” pahayag ni Dy.
Magabulig ini nga tikang suno sa iya sa implementasyon sang Executive Order No. 93. Sa idalom sini nga order, gin-suspinde ang rice importation agud nga maproteksyunan ang local producers sa oversupply kag sa manubo nga presyo.
Ginpahayag man sang House leader nga naghingyo sila kay President Ferdinand Marcos Jr. nga himuon na lamang nga cash ang tanan nga subsidiya halin sa Department of Agriculture. Lakip diri ang ginahatag nga seed subsidy.
