NUEVA VALENCIA, GUIMARAS – Isa ka bulan nga lapsag sa Brgy. Calaya, Nueva Valencia, Guimaras ang nagpositibo sa COVID-19.
Ini ang ginkumpirma sa Bombo Radyo ni Mayor Emmanuel Galila.
Suno kay Galila, ang nasambit nga baby boy ang ginbun-ag sang Agosto 12 kag ginkuhaan sang swab sample sang Setyembre 23.
Ginpahayag ni Galila nga ang lapsag ang nakabatyag sang hilanat kag Loose Bowel Movement rason nga gindala ang pasyente sa Rural Health Unit sang Nueva Valencia sang Setyembre 22 antes gin-refer sa provincial hospital sa banwa sang Jordan.
Nalakip sa contact tracing ang pamilya sang lapsag lakip na diri ang mga medical staff nga naka-uyat sa pasyente.
Sa subong, negatibo sa COVID-19 ang mga himata sang lapsag samtang ginahulat naman ang resulta sang COVID-19 test sang mga medical staff.
Ang lapsag ang naka-facility quarantine sa subong.
