ILOILO CITY – Isa ka 1-month old baby ang nalakip sa mga nagpositibo sa COVID-19 sa syudad sang Iloilo.
Santo sa record sang COVID-19 team sa syudad sang Iloilo, naglab-ot sa 27 ang COVID-19 cases nga na record sang August 16-17.
Sa interview sang Bombo Radyo kay Public Safety and Transportation Management Office Head Jeck Conlu nga nagaserbe man nga focal person for COVID-19, iya ginpahayag nga ang lapsag ang naka-facility quarantine kaupod sang iya iloy nga residente sang distrito sang Jaro.
Suno kay Conlu, as of August 10-16, naglab-ot sa 201 ang COVID-19 cases sa bug-os nga syudad kun sa diin 2 diri ang Authorized Person Outside Residence, 177 ang Local kag 22 ang new cases.
Sa 201, 122 gid diri ang male kag 79 ang female rason nga ginatun-an sang COVID-19 team kun bala mas madali nga malatnan sang virus ang mga lalaki kun ipaanggid sa mga babayi.
May kaangtanan diri, ginhingadlan man ni Conlu ang mga highly monitored barangay sa syudad kun COVID-19 cases ang pagahambalan kag ini ang ginalakipan sang:
San Juan, Molo – 15
Calaparan, Arevalo – 10
Calumpang, Molo – 8
North Baluarte, Molo – 7
Taft North, Mandurriao – 6
Quintin Salas, Jaro – 6
Tacas, Jaro – 6
Benedicto, Jaro – 5
Bo. Obrero, Lapuz – 5
Sinikway, Lapuz – 4
Tabuc Suba, Jaro – 4
Rizal Estazuela, City Proper – 4
Santo sa pagpangusisa, local transmission ang natabo sa lapsag nga santo sa record amo ang pinakabata nga COVID-19 positive sa syudad sang Iloilo.
Ginpahayag ni Conlu nga ang lola amo ang una nga nakitaan sang sintomas kag sa subong, ginahulat pa ang resulta sang COVID-19 test sang iloy sang 1-month old baby.
Indi pa matumod suno sa natungdan kun paano nalatnan sang virus ang lola sang lapsag.
