Iloilo – Patay ang driver sang motorsiklo, samtang kritikal ang backrider sini matapos nakabunggo sa elf truck sa Barangay Lico-an, Barotac Nuevo, Iloilo.
Ang napatay amo si Jelbert Serenio, 34 kag ang pilason nga backrider sini amo ang iya utod nga si Jessie Serenio, 36, lunsay mga residente sang Barangay Bungca, Barotac Nuevo, Iloilo.
Samtang, ang driver naman sang elf truck amo si Benjamin Demandante III, 40, kag residente sang Barangay Ferraris, Sara, Iloilo.
Sa interview sang Bombo Radyo kay Police Staff Sergeant Renebe Blanco, imbestigador sang Barotac Nuevo Municipal Police Station, iya ginpahayag nga nadulaan sang kontrol sang motorsiklo si Serenio rason nga nakabunggo sa elf truck.
Suno kay Blanco, patal nga pilas sa ulo ang gintunaan sang kamatayon ni Jelbert Serenio.
Nahibaluan nga padulong kuntani sa direksyon sang Anilao, Iloilo sanday Serenio kag maga-deliver naman sang isda sa Iloilo Fish Port Complex ang driver sang elf truck.
Padayon naman ang imbestigasyon sang kapulisan sa insidente.
Sa subong, yara na sa kustodiya sang Barotac Nuevo Municipal Police Station si Demandante.
