Ginkumpirma sang Philippine Coast Guard (PCG) nga may isa nga napatay kag tatlo pa ang nagapabilin nga missing matapos nga nagbunggo ang pila ka mga barge kag iban pa nga sakayan sa taytay sa Pasig City sang nagligad nga semana.
Ginkilala ang biktima nga amo ang 48-anyos nga mekaniko nga naga-trabaho sa isa ka barge. Gin-anod ini 12 kilometros halin sa F. Manalo Bridge sa Pasig pakadto na sa Delpan area sa Manila nga amo na ang baba sang Manila Bay.
Ang tatlo ka missing naman nga mga trabahador ang naka-kontrata sa idalom sang Toyo Construction Company.
Base sa imbestigasyon, 12 gid ka mga sakayan ang yara malapit sa Pasig-Marikina River Channel Phase 4, apang bangud sa mabaskog nga hangin kag daludo sang tubig, naanod ang mga ini sang pasado ‘la una sang hapon sang Hulyo 24.
Pasado na ‘las kuatro sang hapon sang nakit-an nga nagabunggo na ang pila sa sini nga sakayan sa F. Manalo bridge antes dalayon nga naanod kag naglugdang a ang pila matapos nagbunggo sa Manggahan flood gate.
Ginpahayag man sang mga residente nga may nakit-an sila nga mga tawo nga naglumpat pa sa barge antes ini nakabunggo sa taytay.
Na-rescue ang iban nga mga personnel sang barge apang apat ang nakit-an nga gin-anod sang tubig pakadto sa suba kun sa diin isa sa ila ang na-rescue walo ka oras ang nakaligad.
Samtang nagapadayon ang pagpangita sa missing workers, nagsugod naman ang ahensya sa pagguyod sa naguba nga mga vessel sa palibot sang F. Manalo bridge.
