Patay ang isa lalaki kag pilason ang iya tatlo ka kaupod matapos nakabunggo sa kahoy ang ila ginsakyan nga pick-up truck sa Barangay Tinocuan, Dueñas, Iloilo.
Ang napatay nga biktima amo si Arnie Talanas, ginapahayag nga nagatrabaho sa isa ka construction company.
Ang mga pilason naman amo sanday Ana May Perez, Jelica Petrola, kag ang driver nga si Anthony Cajuyong.
Sa interview sang Bombo Radyo kay Police Captain Rey Pabalan, hepe sang Dueñas Municipal Police Station, iya ginpahayag nga halin sa syudad sang Passi ang salakyan kag padulong sa Dingle.
Madasig suno kay Pabalan ang dalagan sang pick-up truck, kag santo sa panaysayon sang driver, gulpi siya may nakit-an nga nagatabok sa dalan gani gilayon siya nga nagpreno.
Bangud basa ang dalan, nadulaan sang kontrol ang salakyan kag nabunggo sa naka-park nga motorsiklo, nakabunggo pa gid sa kahoy nga mahogany, kag nahulog sa kilid sang highway.
Sa front seat nagapungko si Talanas kag sa iya nagtupa ang daku nga impact sa pagkabunggo nga nangin rason sang iya nga kamatayon.
Sa ospital sa syudad sang Passi ginhingagaw-dala ang iban nga biktima nga lunsay nakaangkon sang menor nga mga pilas.
