Patay ang isa ka pedestrian samtang tatlo naman ang pilason matapos mabunggu-an sang isa ka motorsiklo sa Brgy. Tigmalapad, Miag-ao, Iloilo.
Ang biktima nga ginbawian sang kabuhi amo si Jerry Niday Sr., 52, residente sang Brgy. Ubos Ilawod sa amo man nga banwa.
Ang driver naman sang motorsiklo amo si JB Adrian Forro Gumban, 25, kag residente sang Brgy. Pandac, Pavia.
Base sa rekord sang pulis, ang mga napilasan amo sanday Maria Allen Niday, 45; Nilda Castro, 66; kag Clemente Castro, 74, lunsay mga taga-Miagao.
Sa interview sang Bombo Radyo kay Police Major Richard Lao, hepe sang Miag-ao Municipal Police Station, iya ginpahayag nga nadulaan sang kontrol ang motosiklo sa dulhugon nga dalan kag nag-overshoot ini sa barangay assistance desk kag nabunggu-an ang tatlo tanan ka mga biktima.
Gindeklarar nga dead-on-arrival sa Rural Health Unit (RHU) si Niday, Sr. samtang nakaagum sang pilas sa nagkalain-lain nga parte sang lawas ang tatlo pa ka biktima kun sa diin padayon pa ini nga ginabulong sa ospital.#
(Article by: Bombo Phauline Pillora)
