Patay ang isa ka lalaki samtang duwa naman ang nasamaran matapos nga maigo sang kilat sa Barangay Umilig, Buenavista, Guimaras, gab-i sang Hunyo 23.
Sa interview sang Bombo Radyo kay Police Captain Ma. Jona Casono, Acting Chief of Police sang Buenavista Municipal Police Station, iya ginpahayag nga nagluntad ang insidente samtang nagabundak ang mabaskog nga ulan kag sunod-sunod ang pagpangilat sa nasambit nga lugar.
Ginkilala ang napatay nga si alyas Toto, 20 anyos kag residente sang Brgy. Umilig, samtang ang mga nasamaran naman amo sanday alyas Paul, 28 anyos, kag alyas Ken, 28 anyos, nga residente sang Buenavista.
Base sa imbestigasyon sang mga kapulisan, nagapahuway-huway ang tatlo sa isa ka payag nga nahamtang malapit sa lawod.
Samtang nagahanda na kuntani sa pagtulog ang tatlo, nagguwa ang isa sa ila agud nga mag-CR.
Ginapahayag nga gulpi nga naglupok ang cellphone sang isa nila ka upod nga ginapatiahan nga naigo sang kilat.
Bangud sang mabaskog nga impact, ginapatihan nga naglaton ang kuryente sa mga biktima.
Gilayon nga gindala ang mga biktima sa ospital apang gindeklarar nga dead on arrival si alyas Toto samtang nasamaran naman and duwa sini ka mga upod.
