JANIUAY, ILOILO- Masobra 80 ka mga tawo ang naaresto matapos maaktuhan nga nagapatigayon sang illegal nga bulangan paagi sa online betting sa Janiuay, Iloilo.
Kalakip sa mga nadakpan amo ang mag-asawa nga sanday Ramon Barranco,60 kag Fely Baranco,52, sang Gines, Janiuay, Iloilo.
Ang lalaki nga Barranco ang tag-iya kag nagaserbi nga manager sang bulangan.
Sa interview sang Bombo Radyo kay Pol. Capt. Dadje Delima, hepe sang Janiuay Municipal Police Station, iya ginpahayag nga sa nasambit nga bulangan,wala sang nagakatabo nga aktwal nga bulang.
Sa baylo, suno sa iya, may yara sang live stream nga gina-feed gikan sa iban nga lugar kag ginapustahan lang sang nagalantaw.
Ginpahayag ni Delima nga sang ila ginsulod ang nasambit nga bulangan, madasig nga nagpinalagyo ang mga tawo sa sulod rason nga sa ginabanta 200 ka mga tawo,82 gid lang ang nadakpan.
Pasakaan naman sang kaso nga paglapas sa anti-gambling law ang mga nadakpan.
Bangud naman sa kadamuon sang mga arestado,ginkinahanglan pa nga mag tap sang janiuay Municipal Police Station sa mga kaiping nga banwa agud madala sa Iloilo hall of Justice ang mga arestado para sa inquest proceedings.
May gin-set naman nga bail ang korte nga 10,000 tubtob 12,000 kada isa ukon ginabanta sa kapin isa ka milyon ka pesos sa pangkabilugan.
Apang suno kay Delima, indi tanan nagpabutyag sang intensyon nga magpyansa rason nga gina-problema ang pagginutok sang mga arestado sa detention cell sang Janiuay Municipal Police Station.
Ang operasyon ginpatigayon sang Iloilo Police Provincial Office Intelligence branch sa pagpamuno ni Pol. Major Jonathan Pinuela kag sang Janiuay Municipal Police Station sa pagpamuno ni Pol. Capt. Dadje Delima sa diin ila narekober ang laptop kag projector nga ginagamit sa iligal nga operasyon.
