ILOILO CITY – Padayon pa nga ginapangita ang isa sa apat ka mga menor de edad nga suspek nga nakapalagyo matapos ginbuno ang isa ka taxi driver sa Brgy. Nabitasan, La Paz, Iloilo City.
Ang biktima amo si Alfredo Samong, 64, sang Maasin, Iloilo kag driver sang Welix taxi.
Sa exclusive interview sang Bombo Radyo kay Police Staff Sgt. Angel Lemery, imbestigador sang La Paz Police Station, iya ginpahayag nga nagsakay sa taxi ang apat ka mga menor de edad sa unhan sang Metro Iloilo Water District sa Brgy. Danao, Iloilo City kag nagpadul-ong sa distrito sang Mandurriao.
Ang mga suspek ang ginalakipan sang tatlo ka mga solterito, indi maglapaw sa 15 anyos kag isa ka dalagita, 17 anyos nga lunsay mga nagaliho-liho.
Suno kay Lemery, pag-abot sa guwa sang isa ka subdivision sa Brgy. Nabitasan, naghingyo ang dalagita nga magpanaog sa taxi agud nga makapangihi.
Sa baylo nga manaog, ginbuno sang dalagita ang taxi driver sa li-og gamit ang kutsilyo apang natigayon ini nga maagaw sang driver.
Nagdalagan naman ang mga suspek sa diin nadakpan ang tatlo lakip na ang dalagita apang nakapalagyo ang isa ka solterito.
Nadakpan ang isa ka solterito sa ibabaw sang kahoy samtang ang isa ka lalaki kag ang dalagita ang nadakpan nga nagakuob sa hilamunan.
Gin-athag naman ni Lemery nga wala sanmay natabo nga pagpanghold-up sa baylo nasaskuhan lamang ang biktima.
Gindala sa Balay Dalayunan sa Bo. Obrero sa distrito sang Lapuz ang mga solterito kag sa Department of Social Welfare and Development Crisis Intervention Unit naman gindala ang dalagita.
