Plano nga dal-on sa rehabilitation center sa banwa sang Pototan ang isa sa lima ka mga child in conflict with the law (CICL) nga nakagwa sang nagligad nga adlaw sa Balay Dalayunan sa Bo. Obrero, Lapuz kag ginatudlo nga suspek nga nagpang-hold up sa Quirino Lopez Bridge sa Iloilo City Proper.
Sa interview sang Bombo Radyo kay Teresa Gelogo, Head sang City Social Welfare and Development Office (CSWDO), iya ginpahayag nga bangud ini sila ang CICL, ang Korte ang maga-desisyon kun ano ang madangtan kag kon sa diin sila ibutang nga nakasanto sa ila ginapangatubang nga kaso.
Isa diri sa ila ang involved sa illegal nga droga kag ginahulat nalang subong ang decision halin sa Korte agud matigayon nga maipaidalom sa rehabilitation.
Suno kay Gelogo, ang sa iban nga mga kabataan, kapareho man ang proseso, kapareho sang ginahimo sa Department of Social Welfare and Development Rehabilitation Center for youth sang Nueva Valencia Guimaras.
Indi man manegar suno sa natungdan nga may bes nga makagwa gid ang mga kabataan bangud kay ginarason nga nahidlaw sila sa ila ginikanan.
Nahibaluan nga ginguba sang mga menor-de-edad ang grills sa bintana nga may sliding window rason nga nakapalagyo.
Natigayon naman ini nga makay-o kag maislan sang city engineers office sang mas dako nga grills agud indi na maguba pa.
