Ginbasura ang isa sa pito ka mga kaso nga ginapangatubang sang drag artist nga si Pura Luka Vega kaangot sa iya kontrobersyal nga performance sang “Ama Namin” nga ginkaakig sang Catholic community sa pungsod.
Suno kay Pura nga ang legal nga pangalan amo si Amadeus Fernando Pagente, nalipay siya nga at least may isa ka kaso nga na-dismiss. Pahayag pa sini, “Laban lang.”
Matandaan nga gindakop anay sang Manila Police District si Pura kasunod sang mandu sang Manila Regional Trial Court Branch 36 bangud sang ginpahayag nga “immoral doctrine, obscene publications and exhibition, and indecent shows.”
Naka-guwa siya sa presuhan matapos nakapyansa sang P72,000.
Magluwas sa iya anum ka iban pa nga mga kaso nga pending tubtub subong, isa man ka persona non grata si Pura sa 17 ka mga lugar lakip sa Manila, General Santos City, Floridablanca sa Pampanga, Laguna, Nueva Ecija, Cagayan de Oro City, Bukidnon, Cebu City, kag Toboso sa Negros Occidental.#
