ILOILO CITY -Gin-athag sang Task Force Boracay nga maximum period lang ang isa ka tuig nga rekomendasyon para ipasirado ang Boracay.
Sa interview sang Bombo Radyo, ginpahayag ni Department of Interior and Local Government (DILG) Assistant Secretary kag Task Force Boracay head Epimaco Densing III nga kun matapos ang rehabilitasyon sang isla nga indi maglab-ot sa isa ka tuig, gilayon man ini nga buksan.
Suno sa opisyal, naghatag bug-at sa pagpasirado sang isla ang rekomendasyon mismo ni Department of Environment and Natural Resources (DENR) Secretary Roy Cimatu.
Ginpahayag ni Asec. Densing nga ang resulta sang evaluation sa tubig nga nagaguwa sa Bulabog drainage outfall sa Boracay ang nagtulod kay Cimatu nga ugyunan ang pagpasirado sang bilog nga isla sang Boracay.
Nag-apelar naman sang paghangop ang mga ahensiya sang gobyerno nga amo ang in-charge sa rehabilitasyon sang Boracay, sa ginaduso nga pagpasirado sang isla.
Suno kay Densing, sakripisyo para sa gobyerno ang pagpasirado sang isla nga isa sa top tourist destination sa kalibutan.
Apang kinahanglan nga tan-awon suno kay Densing ang long-term nga benepisyo sang nasambit nga lihok sang gobyerno.
Antes ang Marso 26, target sang Task Force Boracay nga mapaidalom na sa state of calamity ang Boracay kag maaprubahan na ni Presidente Rodrigo ang pagpasirado sa isla.
Gin-athag naman ni Densing nga hatagan sang isa ka bulan nga notice ang tanan nga mga stakeholders sa Boracay antes lubos nga ipasirado ang isla.