ILOILO CITY -Ginmanduan na sang pamunuan sang Iloilo Provincial Police Office (IPPO) nga magpaathag ang 10 ka mga chief of police sa probinsiya bangud sa kapaslawan nga himuon ang ila katungdanan sa pagpatuman sang Oplan Tokhang Reloaded.
Sa interview sang Bombo Radyo, ginpahayag ni IPPO director S/Supt. Harold Tuzon nga may 72 oras ang mga chief of police sa banwa sang Alimodian, Concepcion, Dingle, Dumangas, Lambunao, Lemery, Maasin, Pototan, Zarraga kag Passi City agud magpaathag.
Suno kay Tuzon, zero accomplishment ang nasambit nga mga chief of police sa sulod sang isa ka bulan.
Gin-ako naman sang opisyal nga manubo ang output sang IPPO sa kampanya batok sa iligal nga droga.
Ginpahayag ni Tuzon nga dapat nila matupungan ang masobra 7,000 nga drug surrenderers sa nauna nga Oplan Tokhang, rason nga dapat magpanikasog ang mga pulis sa probinsiya sang Iloilo.