Sa entrada nga adlaw mismo sang Septyembre nawad-an sang mga kagamitan kag puluy-an ang pila sa mga residente sa Zone 8, Barangay Veterans Village, City Proper.
Ini kasunod sang sunog nga nagluntad samtang may yara sang power interruption sa pila ka areas sang syudad.
Sa interview sang Bombo Radyo kay Erna Magdaluyo, staff sang City Social Welfare and Development Office-City Proper, iya ginpahayag nga 10 ka mga balay ang naapektuhan sang sunog.
Sa sini nga numero, apat gid ang naubos lamon sang kalayo.
Nalakip naman sa anum ang balay nga naguba bangud ginsakaan sang mga bombero samtang ginatinguhaan nga madasig nga mapalong ang sunog.
Isa ka oras ang ginlawig halin sang nabaton ang fire call tubtub sa gindeklarar sang awtoridad nga fire out na.
Sandig naman kay Barangay Kagawad Pederito Malicay, una sila nga nakapanimaho sang sunog nga kuryente nga sang ulihi nakit-an suno sa iya nga naghalin sa balay sang pamilya Gubac.
NAGAPANGABAY SANG BULIG
Nagakinahanglan naman sang bulig ang boarders sa amo nga zona matapos nga naapektuhan sang sunog.
Sa interview sang Bombo Radyo kay Darlene Gubac, bata sang tag-iya sang boardinghouse, iya ginpahayag nga wala gid sang nasapar nga gamit ang 19 nila ka mga boarders bangud sa madasig nga paglamon sang kalayo.
Suno kay Gubac, mangin siya kag ang iya utod nga yara man sa boardinghouse sang natabo ang sunog ang wala man sang nasalbar sa ila mga kagamitan magluwas sa iya cellphone. Nahingagaw man salbar ang ila nga hinuptanan nga ido.
Dugang sini, nagalaum sila nga may mag-abot nga bulig ilabi na sa boarders nga mga pigado man. Ang iban sa ila suno kay Gubac ang nagabaligya sang balut.
Ginahibalo pa sang Bureau of Fire Protection (BFP) kun ano ang rason sa nagluntad nga fire incident.
