ILOILO CITY- Ginsaway sang Run After Contribution Evaders Team (RACE) sang Social Security System (SSS) ang 10 ka commercial establishments sa Iloilo City nga nakitaan sang kapaslawan nga mag-remit sang kontribusyon sang ila mga empleyado.
Sa interview sang Bombo Radyo kay Dr. Lilani Benedian, Vice President sang SSS-Visayas , iya ginpahayag nga nagalab-ot sa P2.6 million ang kabug-usan nga wala ma-remit nga mga kontribusyon.
Suno kay Benedian, ini nga mga establishments ang ginhatagan sang 15 ka adlaw para nga ma-settle ang ila violation.
Pahayag niya nga kun mapaslawan ang mga employers nga mahitso ini sa 15 ka adlaw, ipaagi na ini sa legal nga proseso kag magapangatubang sila sang kaso criminal.
Gindugang naman ni Benedian nga nagatanyag ang SSS sang Pandemic Relief Restructuring Program (PRRP) nga may katuyuan nga mapamag-an para sa employer ang pagbayad paagi sa installment.
Suno sa natungdan, ini para mabuligan ang mga employers nga nakakumiter sang delinquent contribution bilang epekto sang pandemya.
