ILOILO CITY – Naglab-ot na sa 15 ang kabug-usan nga numero sang mga naka-angkon sang close contact sa duha ka pari nga nagpositibo sa Coronavirus Disease 2019 (COVID-19).
Sa interview sang Bombo Radyo kay Dr. Bernard Caspe, pinuno sang City Health Office, iya ginpahayag nga ang duha ka pari ang naghalin sa Metro Manila kag nagpauli sa Iloilo sang Hunyo 23 sakay sa barko.
Suno kay Caspe, ginahibalo pa kun ano ang ginsakyan sang duha ka pari halin sa Caticlan port padulong sa syudad sang Iloilo apang ang isa ang na-classify nga Locally Stranded Individual samtang ang isa naman ang na-classify nga Authorized Person Outside Residence.
Ginpahayag ni Caspe nga nagnegatibo sa Rapid test sa Metro Manila ang duha ka pari kag liwat man nga nagnegatibo sa Rapid test nga ginpatigayon sa Diamond Jubilee Hall apang nagpositibo sa confirmatory test nga ginpaguwa sang Hunyo 29 kag Hunyo 30.
Santo sa imbestigasyon, Hunyo 24 sang nagpamahaw pa sa isa ka fast food chain sa syudad sang Iloilo ang duha samtang sang Hunyo 25-29, nagsulod sa tatlo ka bangko, isa ka coffee shop, isa ka courier service kag nagtambong pa sa pagsinapol sa isa ka eskwelahan ang mga pari kun sa diin naka-angkon sang close contact ang 10 ka manunudlo.
Gin-athag man sang natungdan nga wala nakapatigayon sang misa ang duha ka pari kag sa baylo, nagtambong lamang sila sa misa kun sa diin naka-angkon sang close contact ang lima ka madre nga lunsay naman naakuhaan sang swab sample para sa COVID-19 test.
Samtang, wala naman direkta nga ginsabat ni Dr. Jessie Glen Alonsabe, pinuno sang Regional Epidemiology and Surveillance Unit sang Department of Health Region 6, kun bala may yara sang breach of protocol nga natabo.
Ang maathag lang suno kay Alonsabe amo nga may yara sang protocol nga ginasunod ilabi na sa mga Locally Stranded Individual kag sa repatriated Overseas Filipino Workers kag ini amo ang pagpaidalom sa quarantine kag sa COVID-19 test.
