Posible nga magsaka sa red category ukon election area of grave concern ang 10 ka mga banwa sa Probinsya sang Iloilo base sa resolusyon nga ginpagwa sang Regional Security Coordinating Center.
Sa interview sang Bombo Radyo kay Pol Col. Adrian Acollador, direktor sang Iloilo Police Provincial Office (IPPO), iya ginpahayag nga ginahulat na lang ang approval kag validation naghalin sa National Headquarters angut sa amu nga resolusyon.
Suno kay Acollador, wala pa man sang suspected election related incidents sa Probinsya.
Wala naman sang nagakamonitor nga private armed groups sa Iloilo Province.
Apang, suno sa natungdan ang dako nga pagpamahug sa eleksyon amu ang communist terrorist groups (CTG) bangud man sa pila ka mga natabo nga engkwentro sang tinalikdan nga bulan.
Nahibalu-an nga yara sa red category ukon election area of grave concern ang Calinog, Iloilo.
Ginalakipan naman sang Sara, Bingawan, Lambunao, Maasin, Janiuay, Alimodian, San Joaquin, Tubungan, Igbaras, Miagao, Leon, Lemery kag San Dionisio, Iloilo ang orange category ukon ang election area of cocern.
