PASSI CITY – Napulo ka mga barangays sa Passi City ang nakaeksperyensiya sang mataas nga lebel sang tubig kasunod sang mabaskog nga pag-ulan nga dala sang Low Pressure Area.
Nahibaluan nga gin-anunsyo ni Passi City Mayor Stephen Palmares nga yara na sa critical level ang tubig sa Jalaur River sa diin apektado ang mga barangay nga ginalakipan sang Quinagaringan Grande, Quinagaringan Pequeño, Agdahon, Gines Viejo, Poblacion Ilawod, Poblacion Ilaya, Man-it, Batu, Libo-o, kag Gemat-y.
Sa interview sang Bombo Radyo kay Mayor Palmares, iya ginpahayag nga ginpakamaayo sini nga buksan ang mga evacuation centers sa syudad kaangay sang Passi City Arena kun sa diin mahimo nga mag-cater sang 3,000 tubtob 4,000 ka mga evacuees.
Suno kay Palmares, gin-abisuhan na ang mga pumuluyo nga nahamtang sa delikado nga mga lugar nga mag-evacuate kag makipag-angot sa barangay officials agud malikawan ang peligro.
Samtang, nagdeklarar naman ang natungdan sang class suspension sa tanan nga lebel subong nga adlaw Marso 4.
