Ginkumpirma sang Department of Foreign Affairs (DFA) nga nakapauli na diri sa Pilipinas ang 10 ka dugang nga mga Pinoy nga nagkadto sa Cambodia kag ginpilit nga paubrahon sa online scams.
Suno sa ahensya, nag-abot sila kahapon, kag nakabaton sang bulig halin sa DFA, Department of Migrant Workers (DMW), Overseas Welfare Workers Administration (OWWA), kag Inter-Agency Council Against Trafficking (IACAT).
Na-rescue ini nga mga Pilipino sa probinsya sang Oddar Meanchey, gindala sa kapital nga syudad sang Phnom Penh, kag gin-atipan sang embahada tubtub nga naproseso ang pagbalik sa Pilipinas.
Nahibaluan nga madamo sang scam centers sa Cambodia, Laos kag Myanmar nga nagapadalagan sang illegal online schemes agud nga makuwartahan ang mga tawo.
Magluwas nga gina-engganyo sini ang mga tawo nga magsulod sa peke nga investments, gina-traffic man sini nga scam centers ang mga tawo halin sa kaiping nga mga pungsod agud nga ila mapa-trabaho sa ila compound kag magdugang sa ila nga pwersa.
Liwat naman nga nagpanawagan ang DFA sa mga Pilipino nga mag-andam sa mga trabaho nga ginatanyag sa luwas sang pungsod nga masami makit-an sa social media.
