ILOILO CITY – Ginpaidalom na sa isolation ang 10 ka police personnel sang Iloilo City Police Station 1 nga identified direct contact sang isa ka personnel nga COVID-19 positive.
Sa interview sang Bombo Radyo kay Police Major Francisco Paguia Jr., hepe sang Iloilo City Police Station 1, iya ginpahayag nga ang 10 ka personnel ang napaidalom naman sa COVID-19 test paagi sa swab sample.
Suno kay Paguia, ang police personnel nga nagpositibo sa COVID-19 ang nakitaan sang sintomas sang Pneumonia kag bilang protocol sa tagsa ka hospital, ang mga pasyente nga gina-admit ang ginapaidalom sa COVID-19 test.
Ginpahayag ni Paguia nga wala gin-lockdown ang police station bangud nga gilayon nga nagpatigayon sang contact tracing apang sa subong, may yara sang adjustments sa ginahatag nga serbisyo.
Magluwas sa 10 ka direct contact sang COVID-19 positive, may una naman nga batch sang mga personnel nga ginpanugyanan nga mag-home quarantine anay matapos ginpaidalom sa COVID-19 test.
