GUIMARAS – Nagsaka na sa 10 ang numero sang COVID-19 positive nga mga pulis sa Jordan Municipal Police Station sa probinsya sang Guimaras.
Sa interview sang Bombo Radyo kay Police Major Kenneth Bermejo, hepe sang nasambit nga estasyon, iya ginpahayag nga asymptomatic ang tanan nga mga pasyente.
Matandaan nga 11 sila nga gin-subject sa swab test sang Hulyo 28 matapos natumod nga close contact sang isa ka COVID-19 positive nga police personnel.
Sa 11 nga gin-swab test, siyam ang bag-o nga nagpositibo lakip na si Bermejo.
Suno kay Bermejo, nagapabilin lang sila anay sa police station bangud gutok na ang quarantine facilities sa Guimaras.
Ang duha nga negatibo sa COVID-19 ang nadala man sa istrikto nga quarantine bangud close-contact man sila gihapon.
Ang nabilin nga police personnel sa Jordan nga negatibo sa COVID-19 ang assigned na subong sa Community and Police Action ukon COMPAC sa Barangay San Miguel sa amo nga banwa.
