Ginpadala na sang COVID-19 Team sang Iloilo City Government sa Philippine Genome Center ang 10 ka specimen nga may yara sang mataas nga viral load.
Sa interview sang Bombo Radyo kay Mr. Jeck Conlu, spokesperson sang COVID-19 Team sang syudad, iya ginpahayag nga ang amo nga mga specimen ang halin sa clustering of cases sa Department of Tourism (DOT), Business process outsourcing (BPO) companies, kag Carmelite Monastery sa La Paz, Iloilo City.
Suno kay Conlu, importante nga matumod kun may yara pa sang dugang nga COVID-19 Delta variant sa syudad.
Magluwas diri, may yara pa sang indi magnubo sa 30 ka specimen nga subong ginapa-tsikyar sang syudad sa Epidemiology Bureau sang Department of Health kag kun maaprubahan, ipadala man ini sa Philippine Genome Center.
Pahayag niya, ang tuman ka makalalaton nga COVID-19 Delta variant ang isa sa mayor nga rason kun ngaa mas ginhugtan sang syudad ang mga pagsulundan.
