10 lang ka tawo ang pahanugutan nga makatambong sa Independence Day celebrations subong nga adlaw nga patigayunon sa nagkalain-lain nga mga lugar sa Pilipinas.
Suno kay Philippine National Police Spokesperson Police Brigadier General Bernard Banac, ginasunod lang sang otoridad ang direktiba sang Inter-Agency
Task Force on Emerging Infectious Diseases sa mga public gatherings subong nga may pagpamahog sang Coronavirus Disease 2019.
Ang Independence Day ang masami nga ginaselebrar pinaagi sa pagwagayway sang hayahay sang Pilipinas kag pagkanta sang Philippine National Anthem.
Pahayag ni Banac, tanan nga mass gatherings kag pagpatigayon sang hublag protesta ang ginadumili-an.
Apang may mga grupo nga nagpasalig nga madayon ang pagpatigayon sang hublag protesta batuk sa anti-terrorism bill kag ang mahinay nga response sang
administrasyon kun territorial dispute sa China ang pagahambalan.
Suno sa grupo nga Movement Against Tyranny, ang hublag protesta nga patigayunon subong nga adlaw ang pagatawgon nga “mañanita” matapos nga
naghiwat sang birthday party si National Capital Region Police Office chief Major General Debold Sinas apisar nga paglapas ini sa pagsulundan sa quarantine protocols.
Suno kay Sister Mary John Manansal, kun wala gin-preso si Sinas bangud nag-“mañanita” ini, dapat indi man sila pag-arestuhon subong bangud “mañanita” man ang ila itawag sa nasambit nga aktibidad.
Ginpaandaman ni Banac ang mga protesters nga magapangatubang ang mga ini sang kaso bangud sa patigayunon nga mass actions apisar wala sang permit.
Apang gindepensahan naman ini ni Chel Diokno sa diin iya ginpahayag nga wala sang layi nga nagadumili sa pagpatigayon sang protesta samtang may pandemya.
