ILOILO – Patay ang pulo ka tuig nga bata nga lalaki matapos nalumos samtang nagapaligo malapit sa Jalaur River sa Barangay Simsiman, Calinog, Iloilo.
Ang biktima amo si alyas Renren, kag residente sang nasambit nga barangay.
Sa interview sang Bombo Radyo kay Police Major Myles Dieron, hepe sang Calinog Municipal Police Station iya ginpahayag nga nagapaligo ang biktima kaupod ang iya mga abyan sa idalom sang taytay kun sa diin wala niya natalupangdan nga yara na ini sa madalom nga porsyon sang suba.
Diri na ka nalumos ang biktima nga gintunaan sang iya kamatayon.
Suno kay Dieron, nakapangayo pa sang bulig ang mga abyan sang biktima kun sa diin nagresponde pa ang Calinog Municipal Risk Reduction and Management Office.
Nahibaluan nga gindala sa Calinog District Hospital ang biktima, apang gindeklarar ini nga dead on arrival.
Nagpanugyan naman ang natungdan sa mga ginikanan ukon mga guardian nga bantayan gid ukon i-monitor kung diin masami nagakadto ang ila nga mga kabataan agud malikawan ang kaangay nga insidente.
