Nagpanugyan ang Iloilo Provincial Health Office sa mga pumuluyo nga makagat sang ido ukon sang anuman nga infected animal nga likawan ang pagpatandok.
Sa baylo nga magpalapit sa mga manugtandok ukon traditional healers agud nga makuha ang rabies virus dala sang kagat sang sapat, importante suno sa health office nga magdiretso na sa rural health unit ukon sa treatment centers.
Sa interview sang Bombo Radyo kay Jennifer Oñate, Health Education Promotion Officer II sang Iloilo Provincial Health Office (PHO), iya ginpahayag nga subong nga 2022, may napatay na nga 10 ka tuig nga bata sa Balasan, Iloilo bangud sa rabies.
Ang amo nga biktima ang ginapahayag nag-agi sa manugtandok kag wala gid nagpatublok sang anti-rabies vaccine.
Panugyan ni Oñate sa iban nga makaros ukon makagat sang sapat, hugasan gilayon ang pilas gamit ang habon kag tubig, likawan nga paduguon, butangan sang betadine, i-cover, kag dal-on sa sentro ang pasyente.
Likawan man suno sa natungdan ang nakaandan nga pagbutang-butang sang ahos.
Tanan nga banwa sa Iloilo suno kay Oñate may yara sang Animal Bite Treatment Center nga mahimo gid palapitan sang tawo kun sa diin libre man ang bakuna kag bulong batok sa rabies. ##
