Nagdangat na sa 10 ka tawo ang na-report nga patay sa pag-landfall ni Hurricane Milton bilang Category 3 storm malapit sa Siesta Key sa Florida, Estados Unidos sang Amerika.
Lima sa casualties ang kumpirmado nga yara sa St. Lucie County sa Atlantic coast sang state kun sa diin natabo ang buhawi.
Sa pihak nga bahin, gin-report man sang St. Petersburg police nga may duha ka storm-related deaths sa amo nga syudad samtang ang tatlo naman ang na-rekord sa Volusia County.
May risgo gihapon sang flash flood kag paglapaw sang tubig sa suba nga magabutang sa risgo sa kabuhi sang 11-million ka mga tawo sa amo nga estado.
Base sa poweroutage.us, masobra sa 3.4-million ka mga customer ang wala sang suplay sang kuryente bangud sa malain nga tyempo.
Nahibaluan nga nag-abot si Milton duha ka semana matapos ang paglaslas ni Hurricane Helene sa Florida kag sa pito ka iban pa nga states.
Anay category 5 si Milton apang ginpapanaog sa category 3 antes ini naka-landfall sa western coast sang Florida pasado alas otso sang gab-i sang Miyerkules nga may dala nga 120 mph nga hangin kag mga buhawi.
