ILOILO CITY – Lunsay ginpadangat sa ospital ang mga sakay sang duha ka pribado nga salakyan nga nagbunggu-anay sa Brgy. Bitaog-Taytay, Sta. Barbara, Iloilo.
Sa interview sang Bombo Radyo kay PO3 Francis Guaro, imbestigador sang Sta. Barbara Municipal Police Station, iya ginpahayag nga ginabanta tatlo ang sakay sa puti nga Isuzu D’max samtang pito naman ang sa red orange nga Chevrolet Colorado.
Ang D’max nga may plate number nga ZRT 334 ang halin sa bahin sang Pototan, Iloilo kag padulong sa syudad sang Iloilo sang nabunggu-an sang Colorado nga ginamaneho ni Ricarido Ledesma sang Bacolod City.
Magluwas kay Ledesma, ang mga sakay sang Colorado amo sanday April Ledesma, 7 anyos, Janeth Cardosa, 42 anyos, Mary Deza Cabugnason, 20 anyos, Hermie Dableo, 60 anyos, lunsay sang Old Paglaum Subd. Bacolod City, Lennard Mandawi, 20 anyos kag Princess Ledesma, 11 anyos sang Circumferencial road, Bacolod City.
Gupi ang panguna nga bahin sang duha ka mga salakyan sa diin ang D’max ang nagabunggo pa sa tinumpok nga balas kag bato sa higad sang dalan samtang ang Colorado naman ang nagbunggo sa street light.
Santo sa nakakita, nagtabog pa ang isa ka bata nga nagasakay sa likod sang Colorado.
