ILOILO CITY – Ginpanagtag na sa mga biktima sang Super Typhoon Yolanda ang mga balay nga gintukod sang isa ka foundation nga nakabase sa London, England.
Nagalab-ot sa 100 ka mga pamalay sa Barangay Capinahan, Lemery, Iloilo ang gin-turnover sang Greg Secker Foundation sa mga pamilya nga nawad-an sang puluy-an sang maglaslas ang bagyo Yolanda sadtong 2013.
Ini ang ginpangunahan mismo ni Greg Secker nga founder sang nasambit nga foundation.
Sa interview sang Bombo Radyo Iloilo, ginpahayag ni Secker nga may personal ini nga rason kun nga-a gintukod ang nasambit nga mga pamalay kag ginpili ang banwa sang Lemery.
Suno kay Secker, natingala siya isa ka adlaw nga wala na sang masinadyahon nga nawong nga nagsug-alaw sa iya gikan sa iya kabulig sa balay nga isa ka Ilongga.
Sang iya ini gin-usisa, ginsaysay sang timbang ang gindangatan sang mga kaangay sini nga Pilipino matapos maglaslas ang bagyo rason nga wala ini magduha-duha kag nagdesisyon nga magpatindog sang mga balay para sa mga pamilya nga nawad-an sang puluy-an.
Isa ka residente sa banwa sang Lemery ang nag-donate sang duta nga ginpatindugan sang foundation ni Secker sang mga kabalayan.