Ginatudlo nga ang pag-clog sang mga debris sa drainage sang Iloilo Central Market ang rason sang nagpuswak kag nagkalaguba nga tiles sa merkado.
Ini ang base sa resulta sang ginpatigayon nga joint inspection sang SM Prime Holdings Inc., (SMPHI), Local Economic Enterprise Office (LEEO), kag City Engineer’s Office kahapon nga adlaw.
Sa interview sang Bombo Radyo kay Joy Fantilaga Gorzal, spokesperson ni Mayor Raisa Treñas, iya ginpahayag nga agud malikawan ang masunod nga insidente, magadugang sang water pump sa Iloilo Central Market agud mapadasig ang pagpa-gwa sang tubig padulong sa main drainage system.
Bangud sang insidente, walo ka vendors ang naapektuhan. Sa tatlo ka vendors, ginabulubanta nga masobra ₱229,000 ang balor sang ila mga produkto nga nadamage.
Sa bahin sang rice and grains, naglab-ot sa ₱81,000 ang balor sang 74 ka sako sang bugas ang nabasa.
Sa kabug-usan, ginabulubanta nga masobra ₱311,000 ang kabug-usan nga balor sang mga produkto nga nadamage.
Ginpahayag man nga ang mga claims sang mga vendors gin-submit na sa contractor.
Ginpasalig nga may ara sang 100 percent refund para sa mga apektado nga vendors kag igarelease ini gilayon.
Padayon naman ang close monitoring sang City Government kag mga concerned agencies agud masiguro nga indi na maliwat ang pareho nga problema.
