Natigayon na nga mahatag kag mapadala ang 100,000 nga mga national ID cards sa mga registrants sa bilog nga pungsod.
Suno sa Philippine Statistics Authority (PSA), kabug-usan nga 103,935 nga mga national ID cards nga na-print sang Bangko Sentral ng Pilipinas ang nadeliver na pinaagi sa Philippine Postal Corporation, ang official delivery partner sang Philippine Identification System (PhilSys).
Sang Mayo 1 pa nag-umpisa ang delivery sang mga ID cards.
Pahayag naman ni national statistician Dennis Mapa, ginatinguhaan nila nga mapadasig pa ang card production kag delivery services sa mga masunod nga semana agud nga mas madamo nga mga Filipino ang maga-enjoy sang benepisyo sa pagparehistro sa Philippine Identification System.
Gina-abisohan ang mga registrants nga taguon ang sulat kaupod ang ID bangud ini ang ginalakipan sang confidential information.
Nagpanawagan man ang PSA sa iban nga mga government agencies kag private establishments nga kilalahon kag i-acknowledge ang ID bilang valid proof of identity sa mga transaksyon.
Sa subong, may yara na sang 1.05 million nga mga Filipinos ang nakarehistro na online para sa Philippine Identification System.
