Ginatutukan sang Provincial Government sang Iloilo ang pagpasangkad sang teen centers bilang prayoridad nga programa para sa kabataan kag edukasyon, paagi sa isa ka panibag-o nga Executive Order nga ginpanugyan ni Governor Arthur Defensor Jr.
Sa interview sang Bombo Radyo kay Governor Arthur Defensor Jr., ginpabutyag sini nga ang teen centers ang ginakabig nga puluy-an sang youth development programs sa probinsya kag diri magasulod ang programa para sa mental health, guidance counseling, adolescent health, education, career guidance, kag voter education.
Suno pa sa gobernador nga dapat mapalapad pa ang mga programa sang probinsya agud masiguro nga ang kabataan may akses sa mga serbisyo nga nagapabakod sang ila psychosocial well-being. Ginsiling man niya nga ang pagpabakod sang teen centers padayon nga kabahin sang kabug-usan nga estratehiya sa edukasyon sang Iloilo.
Ang school-based teen center project nagsugod sang 2011, kun sa diin ang probinsya ang nagahatag sang kagamitan samtang ang eskwelahan ang nagapahulam sang kwarto. Sa 2023, gin-upgrade ini sang Provincial Population Office sa Teen Center 2.0, nga may mga stand-alone buildings nga ginatukod para gid sa sini nga programa.
Subong nga tuig 2025, may kabug-usan nga 102 ka teen centers na ang naestablisar sa probinsya, lakip ang 11 ka stand-alone buildings nga nahamtang sa 10 ka banwa kag sa Iloilo National High School. Ang mga banwa nga una nakabenepisyo amo ang Balasan, San Dionisio, San Enrique, Dueñas, Pototan, Maasin, Alimodian, Santa Barbara, Oton, kag Miagao.
Ang teen center project kabahin sang MoRProGRes Iloilo development mantra ni Gov. Defensor nga nagatinguha sang mabakod, progresibo, globally-competitive kag resilient nga probinsya. Ginahingadlan ini nga isa ka epektibo kag transformative nga paagi sa pagpauswag sang edukasyon kag kabataan sa Iloilo.
