ILOILO CITY – Ginhatagan sang tatlo pa gid ka adlaw nga extension ang 103 ka mga restaurants, bars, kag food establishments sa syudad sang Iloilo agud makabutang sang barriers sa ila tagsa ka establisemento.
Sa interview sang Bombo Radyo kay Mr. Nestor Canong, pinuno sang Task Force on Morals and Values Formation kag miyembro sang compliance team sang Iloilo City Government, iya ginpahayag nga as of mid-November, ini nga mga establisemento ang nagapasaway sa mandu sang alkalde nga butangan sang barrier ang ila nga mga lamesa agud malikawan ang COVID-19 transmission.
Sa 250 ka food establishments sa syudad, ang 147 lang suno kay Canong ang nagtuman sa Executive Order 169 nga ginpagwa sang nagligad nga Oktubre ukon ang “An Executive Order Mandating the Installation of Barriers in Bars and Restaurants”.
Suno kay Canong, padayon ang ila nga paglibot kag monitoring.
Kun indi makacomply ang mga food establishments sa nahatag nga extension, nagpaandam ang Iloilo City Government nga ipatuman ang closure.
