ILOILO CITY- Patay ang isa ka 11-anyos nga bata nga babaye sa strafing incident sa Barangay Calansanan, Badiangan, Iloilo.
Sa interview sang Bombo Radyo kay PLt. Ma. Doren Losaria, hepe sang Badiangan Municipal Police Station, iya ginpahayag nga ginpaarakan sang luthang sang suspek ang puluy-an sang biktima nga si alyas Jane.
Suno kay Losaria, igo sa ulo ang naangkon sang bata nga gintunaan sang iya kamatayon.
Tatlo ka lupok naman ang nabatian sang mga tawo sa lugar.
Gilayon naman nga nadakpan ang suspek nga si April John Valle matapos nga madamo nga testigo ang nagtudlo sa iya nga amo ang nangluthang.
Pahayag ni Losaria nga antes ang straffing, involved ang ginikanan sang biktima kag ang suspek sa isa ka vehicular accident sa Janiuay,Iloilo apang ini ang ginsettle na.
Dugang sang hepe, mahimo nga wala nakontento ang suspek sa settlement rason nga nahimo ang pagpangluthang.
Nakahunong na sa Badiangan Municipal Police Station ang suspek kag hugot nga ginapanginwala nga siya ang responsable sa krimen.
