Wala na sang kabuhi sang nasapwan ang 11 ka bulan nga bata nga lalaki sa sulod sang drum sa atubang mismo sang ila balay sa Barangay Sipitan, Tigbauan, Iloilo.
Ang may kahimuan sini amo mismo ang iya kaugalingon nga iloy nga si Mary Jane, 27-anyos, residente sang nasambit nga lugar.
Nahibaluan nga ang bata ang maga-selebrar kuntani sang isa ka tuig nga kaadlawan sini sa Hulyo 25.
Sa interview sang Bombo Radyo kay Wilma Ojerio, punong barangay sang Sipitan, iya ginpahayag nga sang Domingo, Hulyo 20, ginhagad sang iya live-in partner si Mary Jane nga magsimba apang wala ini nag-upod.
Suno kay Ojerio, sang nakapauli na ang iya live-in partner, wala na si Mary Jane amo man ang bata, kag didto nga ginpangita na niya ini.
Kahapon sang aga, Hulyo 21, nakit-an na lamang si Mary Jane nga nagapanago sa kawayanan nga daw may kahadlok, kag ginabulubanta nga may 300-metros ang kalayuon halin sa ila puluy-an.
Ginpalapitan siya sang iya bana kag ginpamangkot kun sa diin na ang ila nga bata, gilayon man sini nga gintuad nga ginsulod niya sa drum.
Gilayon man ini nga ginkadtuan sang iya bana ang nasambit nga drum kag ddto nga nakita sini nga wala na sang kabuhi ang iya anak.
