Sigurado na nga indi magbiyahe buwas nga adlaw Lunes, Marso 23 ang masobra 400 ka public utility vehicles nga sakop sang 11 ka mga transport cooperatives sa Western Visayas bangod sa ila patigayunon nga transport strike.
Sa interview sang Bombo Radyo kay Halley Alcarde, Vice President sang Western Visayas Alliance of Transport Cooperatives and Corporations Inc. (WVATCC), iya ginphayag nga
mabug-at man sa ila buot ang ila patigayunon nga transport strike apang kinahanglan nila ini nga himuon.
Lakip sa mga kooperatiba nga maga-upod amo ang WVTC (Western Visayas Transport Cooperative), CITSCO (City Iloilo Transport Service Cooperative), kag ICAODTC (Iloilo City Alliance of Operators and Drivers Transport Cooperative) nga naga-operate sa nagkalain-lain nga distrito sa Iloilo.
Ginpahayag man sang grupo nga apisar may ara sang binilyon nga budget ang gobyerno para sa mga proyekto sa imprastruktura, apang wala gid sila natutukan ukon nahatagan man lang sang importansya direkta sa sector sang transportasyon nga suno pa sa ila mas madamo kuntani nga pumuluyo ang mabuligan.
Nagapanawagan man ang mga ini nga kuntani mahatagan man sila sang igtalupangod bangud kaangay sang iban nabudlayan man sila sa ila pagakuhaan sang ila pangabuhian ilabi na sa subong nga ginapangatubang nga kabudlayan sa ila sector.
