ILOILO CITY – Nahilo ang 11 ka tawo nga miyembro sang duha ka pamilya nagikan sa Barangay San Isidro, Jaro, Iloilo City matapos mahilo sang ginkaon nga uhong.
Sa interview sang Bombo Radyo Iloilo, ginpahayag ni Punong Barangay Felix Dureza nga may naghatag sang uhong sa pamilya Gardose nga ila man ginluto kag ginsud-an sa panyaga.
Gintagaan man sang mga ini ang pamilya Mijares nga ila man ginkaon.
Apang naglain ang pamatyag sang mga biktima kun sa diin nagsuka ang mga ini kag nag-LBM.
Ginpahayag ni Punong Barangay Dureza nga indi kinaandan nga uhong ang ginkaon sang mga biktima bangud sang iya gin-usisa ang uhong, mapagsot ini kag kaangay nga nagtubo sa higko sang sapat.