ILOILO CITY – Ginhingyo sang taskforce nga nagamonitor sang kaso sang African Swine Fever (ASF) sa syudad sang Iloilo nga dapat mangin alerto ang publiko sa pork products nga ila ginabakal sa mga merkado.
Ini matapos onse ka pakete sang frozen siomai ang nakumpiska gikan sa Iloilo Terminal Market kag ini nga mga produkto ang ginapahayag nakalusot halin sa Antipolo, Rizal kag ini ang nag-agi sa Roxas City, Capiz antes makasulod sa syudad sang Iloilo.
Sa interview sang Bombo Radyo kay Dr. Tomas Forteza, city veterinarian, iya ginpahayag nga ang onse ka mga frozen siomai ang ipadala nila sa National Disease Diagnostic Laboratory sa Quezon City agud makumpirma kon ini ang positibo sa African Swine Fever.
Suno kay Forteza, apisar wala sang direkta nga epekto sa ikaayong lawas sang tawo ang African Swine Fever, nagakadapat gihapon nga mangin alerto bangud ini ang mahimo makalaton sa swine industry kag dapat gid panumdumon sang publiko ang pagprotekta sa industriya sang baboy.
Dugang ni Forteza, mas ginpabaskog man ang ila kampanya batok sa African Swine Fever subong bangud may mga training ang mga personnel sang City Veterinary Office agud mabantayan ang mga pwerto sa Iloilo sa diin posible makalusot ang banned nga pork products.
