Naghatag ang United Arab Emirates sang royal pardons sa 115 ka mga Filipino convict antes ang selebrasyon sang Eid’l Fitr nga amo ang nagamarka sang pagtapos sang balaan nga bulan sang Ramadan.
Ginkumpirma ini ni President Ferdinand Marcos, Jr. sa isa ka press release kun sa diin ginpasalamatan man sini si UAE President His Highness Sheikh Mohamed bin Zayed Al Nahyan.
Ginbalikan man sini ang amo man nga inisyatibo sang UAE sang 2024 kun sa diin 143 man ka mga Pinoy ang gin-pardon sang Eid-Al-Adha kag 220 naman kadungan sang ila okasyon sang National Day.
Ini suno kay Marcos ang nagapakita lang sang espesyal nga partnership sa tunga sang duha ka pungsod. Pamatuod man diri ang malapit isa ka milyon nga mga Pilipino nga yara sa Emirates, kag ang mainit nga pag-abyanay kag respeto sini kay Sheikh Mohamed nga lider sang Emiratis.
“This act of generosity and compassion exemplifies the true spirit of mercy during the sacred occasion of Ramadan and the values of unity and goodwill,’ suno sa Philippine Embassy sa UAE. “The UAE’s steadfast dedication to humanitarian principles and its continued support for the Filipino community in the country are deeply valued.”
