Nagsaka na sa 116 ang napatay sa Estados Unidos sang Amerika kasunod sang paglaslas ni Hurricane Helene.
Ini nga death toll ang na-rekord sa anum ka states partikular sa Florida, Georgia, North Carolina, South Carolina, Tennessee kag Alabama matapos nga nag-landfall si Helene sa Florida bilang Category 4 hurricane.
Suno sa White House, masobra pa sa 600 ang missing ukon “unaccounted for” bilang resulta sang malain nga tiyempo.
Sa subong, masobra duha ka milyon ka mga residente ang wala gihapon sang suplay sang kuryente, kag madamo pa ang wala sang ideya kun nakaluwas ang ila mga himata bangud wala pa nabalik ang estable nga communication services.
Kinahanglan pa nga i-airlift sang officials ang pila ka emergency supplies lakip ang pagkaon kag tubig sa pila ka areas nga may road closures sa gihapon.
Ginkumpirma naman sang White House nga bisitahon ni US President Joe Biden ang North Carolina sa Myerkules agud ma-check ang sitwasyon sang mga residente.
