ILOILO CITY – Natalana nga mag-abot sa Iloilo ang panibag-o nga batch sang mga Overseas Filipino Workers nga na stranded sa Metro Manila subong nga adlaw sa Port San Pedro.
Sa interview sang Bombo Radyo kay Lt. Commander Joe Luviz Mercurio, Station Commander sang Coast Guard Iloilo iya ginpahayag nga base sa manifesto nga ginahatag sang central office sang Philippine Coast Guard nagdangat sa 118 ka mga Overseas Filipino Workers ang sakay sang nasambit nga barko nga magapauli sa syudad kag probinsya sang Iloilo.
Suno kay Mercurio, mahapit pa sa Bacolod ang barko agud ipapanaog ang pila man ka OFW.
Dugang sang natungdan, ginalauman nga maabot ang nasambit nga barko sa Iloilo alas dos sa hapon subong nga adlaw.
