Nagpositibo sa COVID-19 ang 12 anyos nga anak sang isa ka barangay Kagawad sa Poblacion, Jordan, Guimaras.
Sa interview sang Bombo Radyo kay Punong Barangay Edmundo Sumbang, iya ginpahayag nga matapos ginpaidalom sa reverse transcription polymerase chain reaction (RT -PCR) test ang nagabusong nga iloy sang bata, natukiban nga nagpositibo ini sa COVID-19.
Suno kay Sumbang, gilayon nga nagpaidalom ang amo nga iloy sa istrikto nga quarantine kag gindala sa Western Visayas Medical Center sa Mandurriao, Iloilo City.
Gilayon man nga ginpaidalom suno kay Sumbang sa RT-PCR test ang bilog nga pamilya sang amo nga iloy sa diin nagwa nga nalatnan kag asymptomatic sa amo nga virus ang 12 anyos nga anak.
Sa subong suno sa natungdan, yara na sa quarantine facility sa banwa sang Jordan, Guimaras ang amo nga bata.
Dugang pa sang natungdan, ginpakamaayo man nila nga ipaidalom sa lockdown ang ila nga Barangay Hall bangud malapit ini sa balay sang nasambit nga COVID-19 positive nga mag-iloy.
