12 anyos nga bata nga lalaki gindayaw sa paghimo sang iya nga homework sa idalom sang streetlight bangud wala sila sang kuryente sa ila nga balay

PERU – Madamo ang nagdayaw sa 12 anyos nga bata sa Moche, Peru nga nakit-an sa Closed Circuit Television (CCTV) footage.

Ini bangud nga samtang ginatsekyar sang Moche Police Department ang mga security camera sa lugar, ila nakit-an ang bata nga si Martín Angulo Córdoba nga naga pungko sa kilid sang dalan sa idalom sang streetlight.

Sang gin zoom-in sang mga pulis, ila nakit-an nga naga basa kag nagasulat si Victor sa iya nga notebook.

Bangud sa dedikasyon ni Victor sa iya nga pag-eskwela, gin-share sang police department sa social media ang CCTV video kag gilayon nga nangin viral.

Natukiban sang mga pulis nga wala sang kuryente sa balay nanday Victor rason nga sa idalom ini siya sang streetlight nagahimo sang iya nga homework.

Kag mataas man ang grado sang bata apisar sa sitwasyon sang ila nga pangabuhi.

Bangud sini, ginbisita sang alkalde sang Moche ang balay ni Victor kag ginpromisa nga siya mismo ang mabayad personal sang kuryente agud nga indi na ini maguwa pa sa ila nga balay kada gab-i.

Nagpabutyag man sang pagpasalamat si Victor sa nagbulig sa iya sa diin iya ginpahayag nga luyag niya maluwas sa kapigaduhon ang iya pamilya kag handom man sini nga mangin isa ka pulis.

Gani, sa mga estudyante dira, indi upang ang kapigaduhon sa pag-eskwela.

Kinahanglan lang nga maghimakas, dedikasyon kag mangin positibo bangud mangin posible ang tanan sa Diyos.